MahanagarPalika Election 2025:निवडणूक आयोगाने महाराष्ट्रातल्या 29 महानगरपालिकांच्या निवडणुकांच्या तारखा जाहीर केल्या आहेत. मुंबई, नवी मुंबई, ठाणे, कल्याण-डोंबिवलीसह महाराष्ट्रातल्या सर्व 29 महानगरपालिकांच्या निवडणुका
मुंबई आणि नवी मुंबईसह महाराष्ट्रातल्या सर्व निवडणुकांसाठीची आचारसंहिता आजपासूनच निवडणूक आयोगाने लागू केली आहे, त्यामुळे कोणत्याच राजकीय पक्षाला प्रकल्पांचं उद्घाटन किंवा लोकार्पण तसंच भूमिपूजन करता येणार नाही. तसंच मतदानावर परिणाम होईल, अशी कोणतीही घोषणा करण्यात येणार नाही.
मुंबईमध्ये 227 प्रभाग तर नवी मुंबईमध्ये 111 प्रभागांमध्ये मतदान पार पडणार आहे. या मतदानाच्या संपूर्ण प्रक्रियेच्या तारखा आणि कार्यक्रम निवडणूक आयोगाने जाहीर केला आहे.
अर्ज भरण्याची तारीख
23 डिसेंबर ते 30 डिसेंबर 2025
अर्ज छाननीची तारीख
31 डिसेंबर 2025
अर्ज मागे घ्यायची तारीख
2 जानेवारी 2026
निवडणूक चिन्ह वाटप, अंतिम उमेदवार यादी
3 जानेवारी 2026
निवडणुकीची तारीख
15 जानेवारी 2026
मतमोजणीची तारीख
16 जानेवारी 2026
ठाकरेंची प्रतिष्ठा पणाला
मुंबई महानगरपालिकांच्या निवडणुकीमध्ये ठाकरे बंधूंची प्रतिष्ठा पणाला लागली आहे. या निवडणुकीमध्ये उद्धव ठाकरेंची शिवसेना आणि राज ठाकरेंची मनसे एकत्र निवडणूक लढण्याची शक्यता आहे. ठाकरे बंधूंचा सामना भाजप आणि एकनाथ शिंदेंच्या शिवसेनेविरुद्ध आहे.
याआधी 2017 साली मुंबई महानगरपालिकेची निवडणूक झाली होती, तेव्हा राज्यात युतीमध्ये असूनही भाजप आणि शिवसेना मुंबई महापालिकेत वेगळी निवडणूक लढले होते. या निवडणुकीत भाजप-शिवसेनेमध्ये कांटे की टक्कर पाहायला मिळाली होती. शिवसेनेने 84 तर भाजपने 82 जागा जिंकल्या होत्या, यानंतर मुंबई महापालिकेवर पुन्हा एकदा शिवसेनेचा महापौर बसला.
नवी मुंबईत शिंदे-नाईक आमने-सामने
दरम्यान नवी मुंबईमध्ये उपमुख्यमंत्री एकनाथ शिंदे आणि भाजपचे नेते आणि मंत्री गणेश नाईक यांच्यात शाब्दिक चकमक पाहायला मिळाली, यानंतर भाजप आणि शिवसेनेमध्ये थोडा तणावही निर्माण झाला होता.
महत्वाची माहिती पाहण्यासाठी येथे क्लिक करा